राजेशपायलको मिठासपुर्ण स्वरः रियल स्टोरी बोल्ने ‘बोवी’ गीत रिलिज
यथार्थ कथामा बनेको फिल्म ‘बोवी’को अफिसियल गीत रिलिज भएको छ । असार २९ गतेलाई प्रदर्शन मिति तय गर्दै निर्माण युनिटले मंगलबार राजधानीमा एक कार्यक्रमको आयोजना गर्दै फिल्मको गीत रिलिज गर्यो । हाइलाइट्स नेपालको तर्फबाट युट्युवमा अपलोड गरिएको भिडियोमा मिठास संगीत अनि सोहि प्रकारको स्वर समावेश छ ।
गीतमा स्वर राजेशपायल राई र दीपा लामाले दिएका छन् । स्टार सिङ्गर राजेशपायलले यो पटक पनि आफ्नो स्वरको जादु छरेका छन् । वसन्त सापकोटाको संगीत सुमधुर लाग्छ । शब्द पनि सापकोटाले नै लेखेका छन् । उमेश थापा र कविता गुरुङको रियल स्टोरीमा बनेको फिल्मको गीतमा दुबैलाई फिचर गरिएको छ । कोरियोग्राफी कविराज गहतराजको छ । नर्वेका सुन्दर लोकेशनमा गीत छायांकन गरिएको छ ।
मिलन चाम्स निर्देशित फिल्मको यसअघि नर्वेमा प्रिमियर गरिएको थियो । नर्वेबासी नेपाली दर्शकबाट उत्कृष्ट प्रतिक्रिया पाएको निर्माण टिमले बताउँदै आएको छ । फिल्मलाई नवराज कृष्ण थापाले खिचेका छन् । वलिष शाहले सम्पादन गरेको फिल्ममा कविता र उमेशसँगै विजय लामा, रुवी राणा, देशभक्त खनाल, रश्मी भट्ट, सुरविर पण्डित, रवि गिरी, वाल्दिप गिरी, शिशिर राणा, वादल भट्ट र पुर्णिमा लामा लिड रोलमा छन् । वाल कलाकार इलियास थापा पनि फिल्मका लिड कलाकार हुन् ।
‘बोवी’को स्कृप्ट नरेश भट्टराइ र गिरिराज घिमिरेले संयुक्त रुपमा लेखेका हुन् । निर्देशक मिलन चाम्स नै फिल्मको निर्माता छन् । फिल्मलाई राजधानीमा गोविन्द शाही र मोफसलमा मनोज राठी, उज्जल पौडेलले वितरणको जिम्मा लिएका छन् ।
