‘जय शम्भू’ फर्स्टलुक रिलिज, बर्षा पाउन प्रशान्त र अनुपको फाइट !
फिल्म ‘जय शम्भू’को फर्स्टलुक रिलिज पोस्टर भएको छ । भदौ १ गतेलाई प्रदर्शन मिति तय गरेको फिल्मको मंगलबार २ पोस्टर एकसाथ रिलिज गरिएको हो । सार्वजनिक पहिलो पोस्टरमा अभिनेता अनुपबिक्रम शाही र अभिनेत्री बर्षा शिवाकोटीलाई प्रेमभावमा देखाइएको छ भने दोश्रो पोस्टरमा अनुपसँगै अर्का अभिनेता प्रशान्त ताम्राकार एङ्ग्री लुक्समा प्रस्तुत छन् ।
फिल्ममा प्रशान्तले नेगेटिभ क्यारेक्टर निभाएका छन् । दिनेश शाही प्रस्तुत कर्ता रहेको जय शम्भुमा अरविन्द्रमान शाक्य निर्माताको रुपमा रहेका छन् भने चक्र पाख्रिन कार्यकारी निर्माताको रुपमा रहेका छन् । यस्तै सह निर्माताहरु कुशल शर्माा र शिक्षा काफ्ले हुन् । फिल्मलाई रुपेश तामाङले निर्देशन गरेका हुन् । यस्तै फिल्ममा हरि घले लामाको छायाँकन, श्री श्रेष्ठको एक्शन, टंक बुढाथोकीको संगीत, बनिश शाहको सम्पादन, रामजी लामिछानेको नृत्य रहेको छ ।
‘जय शम्भू’लाई राजधानीमा गोपाल काजी कायस्थ र काठमाडौं बाहिर एफडि कम्पनीले वितरण गर्ने भएका छन् । राजधानी वितरणको लागि कायस्थको बिके फिल्मस् सँग पहिलो पटक जयन ईन्टरटेन्मेन्टका जयन श्रेष्ठले पनि सहकार्य गरेका छन् । फिल्म जय शम्भुबाट जयन श्रेष्ठले वितरणमा हात हाल्न लागेका हुन् ।
