‘कोहलपुर एक्सप्रेस’को ‘काउ’ गीतलाई १ करोड भ्यूज
फिल्म ‘कोहलपुर एक्सप्रेस’मा समावेश ‘सिओडब्ल्यू’ (काउ) बोलको गीतलाई युट्युवमा १ करोड पटक हेरिएको छ । युट्युव रिलिजको ५ महिना पुग्दा नपुग्दा उक्त गीत हाइलाइट्स नेपालको युट्युवमा १ करोड बढि पटक हेरिएको छ । निर्मात्री तथा लिड अभिनेत्री केकी अधिकारीले खुशी व्यक्त गर्दै सामाजिक सञ्जालमा स्टाटससहित फिल्मसँग जोडिएका कलाकार, गायक तथा संगीतकारलाई धन्यवाद दिएकी छिन् ।
केकीले युट्युवमा १ करोड भ्यूज पाउने यो नै आफु अभिनित पहिलो गीत भएकोले आफुलाई थप विशेष लागेको समेत लेखेकी छिन् । संगीतकार राजनराज शिवाकोटी स्वयंमको स्वर रहेको गीतको फिमेल भर्सनमा मेलिना राईले स्वर दिएकी छिन् । गीतको शब्द पनि राजनराजको नै हो ।
गीतको भिडियोलाई गम्भिर विष्टले निर्देशन गरेका छन् । भिडियोमा केकीसँगै रीमा विश्वकर्मा, निर्देशक गम्भिरसँगै विनोद न्यौपाने फिचर छन् । कमेडी जनराको फिल्ममा भने ऋचा शर्मा, प्रियंका कार्की, रविन्द्र झा, बुद्धि तामाङ पनि लिड रोलमा छन् ।
विशाल भण्डारीको निर्देशनमा बनेको फिल्म हाल केहि पर्दामा प्रदर्शनको क्रममा छ भने फिल्म विदेशका विभिन्न शहरहरुमा प्रदर्शनको लागी तयार छ । केकीले आफ्नो डेब्यू निर्माणको सफलताको खुशी यसअघि नै सेलिब्रेट गरिसकेकी छिन् । उनले हामीसँगको कुराकानीमा फिल्मको सफलतामा सुत्रधार बन्ने सबै दर्शक, फिल्मकर्मी तथा सञ्चारकर्मीलाई धन्यवाद दिईन् ।
