पाण्डे र लम्साललाई सम्मान, सुवेदी र थापालाई पुरस्कार, दाहाललाई प्रोत्साहन
चलचित्र पत्रकार संघ – नेपालको जेठ २ गते बुधबार बसेको कार्यसमिति बैठकले ‘चलचित्र पत्रकारिता सम्मान तथा पुरस्कार – २०७५’ को घोषणा गरेको छ । चलचित्र पत्रकार संघ नेपालका पूर्वउपाध्यक्ष तथा हाल रमाईलो टिभिका अध्यक्ष दयाराम पाण्डे र नेपाल पत्रकार महासंघका पूर्वसचिव तथा हाल राजधानी दैनिकमा कार्यरत ध्रुव लम्साललाई चलचित्र पत्रकारिता सम्मान प्रदान गरिने भएको छ ।
पाण्डे र लम्सालले चलचित्र पत्रकारितामा पुर्याएको योगदानको कदर गर्दै संघले सम्मान गर्न लागेको हो । त्यस्तै, संघका पूर्वउपाध्यक्ष तथा नयाँ पत्रिका दैनिकमा कार्यरत लक्ष्मण सुवेदी र संघकी सदस्य तथा टिभि फिल्मीमा कार्यरत सन्ध्या थापालाई चलचित्र पत्रकारिता पुरस्कार प्रदान गरिने भएको छ ।
चलचित्र पत्रकारितामा दिएको योगदान र सक्रियताको कदर गर्दै सुवेदी र थापालाई पुरस्कृत गर्न लागिएको हो। पुरस्कार स्वरुप रु.२१ हजार नगद, ताम्रपत्र र ट्रफी प्रदान गरिनेछ ।
साथै, फिल्मीखबर डटकममा कार्यरत अञ्जान दाहाल (मनिष) लाई चलचित्र पत्रकारिता प्रोत्साहन पुरस्कार प्रदान गरिने भएको छ । पत्रकारितामा आवद्द भएको छोटो समयमा नै चलचित्र पत्रकारितामा स्थापित बनिसकेका दाहाललाई प्रोत्साहन स्वरुप पुरस्कार दिन लागिएको हो ।
प्रोत्सान पुरस्कारमा १ थान ल्यापटप, ताम्रपत्र र ट्रफी रहनेछ । आगामी जेठ ७ मा हुन गईरहेको १९ औं स्थापना दिवसको अवसरमा सम्मान तथा पुरस्कार प्रदान गरिने संघका अध्यक्ष सन्दीप सापकोटाले जानकारी दिए ।
सम्मान तथा पुरस्कार प्राप्त गर्न लाग्नुभएका सबैमा बधाई !!
