पर्दामा प्रियंका भर्सेज प्रियंका, दर्शकको रोजाइ कोहलपुर कि लण्डन ?
फ्राइडे रिलिज अन्तर्गत यो हप्ताको लागी शुक्रबारबाट दुई नेपाली फिल्म प्रदर्शनमा आएका छन् । मल्टिप्लेक्समा हलिउड फिल्म ‘एभेञ्जर’को दबदबाका बीच देशैभर ‘हेप्पी डेइज’ र ‘कोहलपुर एक्सप्रेस’ रिलिज भएका हुन् । मल्टिप्लेक्स र सिंगल स्कृनमा दुबै फिल्म उपस्थिती लगभग उस्तै छ ।
त्यसो त यो शुक्रबार पर्दामा अभिनेत्री प्रियंका कार्की भर्सेज प्रियंका कार्की पनि बनेको छ । दुबै फिल्ममा लिड अभिनयमा प्रियंका नै छिन् भने अघिल्ला हप्ताहरुमा प्रदर्शनमा आएका तथा हलमा निरन्तर रहेका दुई फिल्म ‘शत्रु गते’ र ‘लिलिबिली’मा पनि प्रियंका लिड रोलमा हुँदा एकसाथ चार उपस्थिती पर्दामा प्रियंकाको छ ।
विशाल भण्डारीको डेब्यू निर्देशन तथा अभिनेत्री केकी अधिकारीको निर्माणमा बनेको ‘कोहलपुर एक्सप्रेस’मा प्रियंका र केकीसँगै ऋचा शर्मा, कुशाग्र भट्टराइ, विनोद न्यौपाने,रविन्द्र झा, बुद्धि तामाङ लिड रोलमा छन् । फिल्मको सम्पुर्ण छायाँकन बाँकेको कोहलपुर आसपास सकाइएको छ ।
यस्तै आफ्नै फिल्म ‘लिलिबिली’ हलमा रहिरहँदा निर्देशक मिलन चाम्सले ‘हेप्पी डेइज’लाई पर्दामा उतारेका हुन् । यो फिल्मको सम्पुर्णतः छायाँकन युके (लण्डन) आसपास गरिएको छ । फिल्ममा दयाहाङ राइ, प्रियंका कार्की, सञ्जय गुप्ता लिड रोलमा छन् ।
