केकीको प्रचार काइदा, नासाको कार्यक्रममा कोहलपुरलाई फाइदा !
अभिनेत्री केकी अधिकारी आफ्नो निर्माणमा तयार फिल्म ‘कोहलपुर एक्सप्रेस’को प्रचारलाई आक्रामक बनाउँदै छिन् । रिलिजको दिन (बैशाख १४) नजिकिँदै गर्दा केकीले राजधानीदेखि मोफसलसम्म आफ्नो प्रचार सकृयता बढाइरहेकी छिन् । यो बीचमा केकी फिल्मको सम्पुर्ण जसो दृश्य छायाँकन गरिएको ठाउँ बाँकेको कोहलपुर पुगिन् ।
त्यहाँ आयोजित नेपाल अटोमोबाइल एसोसिएसन (नासा)को सडक दर्घटना न्यूनीकरण सम्बन्धि अभियानको केकी अधिकारीले सुरुवात गरिन् । “सार्वजनिक यातायातको संरक्षण गरौ, सुरक्षित यात्राको लागि ट्राफिक नियम पालना गरौ” भन्ने मूल नारासहितको ब्यानर समाउँदै केकीले सदरमुकाम नेपालगन्जसँगै कोहलपुरका विभिन्न स्थानमा जनचेतना फैलाइन् ।
सोहि अबसरमा केकीले स्थानिय दर्शकमाझ नजिकबाट साक्षात गर्दै फिल्मको बारेमा जानकारी गराइन् माया पाउने आशा व्यक्त गरिन् । लोकल अडियन्सको प्रतिक्रियाले दङ्ग केकीले आफ्नै ठाउँमा खिचिएको फिल्मलाई लिएर कोहलपुरबासी उत्साहित बनेको बताइन् । कोहपुरका विभिन्न ठाउँमा पुग्दा केकी सेल्फीमा घेरिएकी थिइन् ।
यसअघि केकी र ऋचा शर्माले राजधानीमा होम डेलिभरी गरेर प्रचार गरेका थिए । विशाल भण्डारी निर्देशित फिल्ममा केकी र ऋचाका अलावा प्रियंका कार्की, बुद्दी तामाङ, रविन्द्र झा, विनोद न्यौपाने, कुशाग्र भट्टराई लगायतका कलाकारको अभिनय छ ।
‘कोहलपुर एक्सप्रेस’मा अर्जुन पोखरेल, कालीप्रसाद बाँस्कोटा र राजनराज सिवाकोटीको संगीत छ भने सम्पादन लोकेश बज्राचार्यको सछ । अर्जुन तिवारीले फिल्म खिचेका छन् ।
