‘कार्टुञ्ज क्रियू’को विशेष प्रस्तुति सहित यस्तो बन्यो ‘बेबी आइ लभ यू’ ट्रेलर
जेठ १८ लाइ प्रदर्शन मिति तय गरेको फिल्म ‘बेबी आइ लभ यू’को ट्रेलर रिलिज भएको छ । बिहिबार राजधानीमा एक प्रेस भेटघाटका बीच निर्माण टिमले ट्रेलर रिलिज गर्यो । ट्रेलरले प्रेम, रोदन र कमेडीपना बोल्छ । ट्रेलरमा चर्चित डान्सिङ ग्रुप ‘कार्टुञ्ज क्रियू’को टिम पनि फिचर छ ।
नव अभिनेता सन्तोष खड्गी र पूजा तिवारीको प्रेमको आसपास फिल्म घुमेको छ । ट्रेलरले यस्तै छनक दिन्छ । कार्यक्रममा बोल्दै फिल्मका प्रस्तुतकर्ता शिव न्यौपानेले फिल्मले युवा पुस्तालाई आकर्षण गर्ने बताए । यस्तै फिल्ममा संगीत समेत भरेका अभिनेता खड्गीले फिल्ममा सक्दो मिहेनत गरेको बताए । जनक पाण्डे निर्देशित फिल्ममा अभिनेता सरोज खनाल, कलाकार निर्मल शर्माको अभिनयसँगै ‘कार्टुञ्ज क्रियू’को पनि एउटा डान्स छ ।
कार्टुन क्रुजको प्रस्तुती रहेको फिल्मको ‘कान्छी मायालु’ बोलको गीत तथा भिडियो हिट भैसकेको छ । फिल्ममा सह निर्माताको रुपमा सृजना परियार र दुर्गा पाण्डे छन् । बिहिबारको प्रेसमिटमा ‘कान्छी मायालु’ गीतमा कभर डान्स र गाउनेलाई पुरस्कृत पनि गरियो ।
बिटुडी डान्स ग्रुप र कभर गाउने प्रितम सेञ्चुरीलाई एक एक लाख बराबरको चेक कार्टुञ्ज क्रु का सरोज अधिकारी, आश्मा विश्वकर्मा तथा समुहले हस्तान्तरण गरे । निर्माण टिमले ट्रेलर सार्वजनिक गर्दै प्रचार प्रसारको थालनी भएको घोषणा गरेको छ ।
