रणविर र दीपिकालाई पछि पार्दै वरुण र आलिया बने नम्बर वान !
बलिउडमा हरेक बर्ष कुन कलाकार लोकप्रिय भन्ने हिसाब किताब हुन्छ । भोटिङ पोलदेखि विभिन्न अध्ययन अनुसन्धानबाट भिन्ना भिन्नै क्षेत्रले जजमेन्ट गर्छन् । पछिल्लो पटक ‘दि स्कोर ट्रेण्ड इन्डिया’ले सर्वाधिक लोकप्रिय कलाकारको रिसर्च गरेर नतिजा बाहिर ल्याएको छ । युवापुस्ताले सर्वाधिक खोजी गरेका कलाकारहरुको सुचीमा यो बर्ष वरुण धवन र आलिया भाट आएका छन् ।
गत बर्ष दीपिका पादुकोणे र रणविर सिंहले ‘मेल-फिमेल’ आर्टिस्टमा अग्र स्थान कब्जा गरेका थिए । यो पटक भने उल्लेखित दुबैलाई दोश्रो स्थानमा पार्दै आलिया र वरुण पहिलो स्थानमा आएका हुन् । तर दीपिकालाई उछिन्दै आलियाको स्कोर उकालो लाग्दैगर्दा वरुण भने पहिलो स्थानमा रहँदा पनि उनको रेटिङ ‘लो’ भइरहेको देखाइएको छ ।
वरुणले १२.५२ स्कोर ल्याएका छन् भने उनलाई पछ्याइरहेका रणविरको स्कोर १०.८५ छ । तेश्रो स्थानमा रणविरलाई पछ्याउँदै सिद्धार्थ मल्होत्रा आएका छन् । उनको रेटिङ स्कोर १०.४४ छ । उता आलियाले ७६.२२ स्कोर ल्याउँदै दोश्रो बरियताकी दीपिकाको स्कोर जम्मा ३८.३८ पाइएको छ । जसले पछिल्लो बर्ष युवापुस्तामाझ आलिया निकै लोकप्रिय बनेको स्पष्ट हुन्छ ।
