Exclusive: बर्षाले हात झिकेको ‘रानीमहल’मा पुर्व मिस नेपाल निकिता अनुबन्धित

मिस नेपाल २०१८ को घोषणा भएको एक हप्तापनि बितेको छैन । यो बीचमा मिस नेपाल २०१७ को उपाधि जितेकी निकित चण्डकले नयाँ मिस नेपाल शृङ्खला खतिवडालाई आफ्नो ताज पहिराइन् । मिस नेपालको एक बर्षको अनुबन्धनसम्म उपाधि बिजेताले अन्य कुनै पनि प्रोजेक्टमा अनुबन्धन हुन नपाउने नियम छ । अब भने यो फुकुवा खुलेसँगै निकिता एक फिल्ममा अनुबन्ध भएकी छिन् ।

प्राप्त जानकारी अनुसार निकिताले आईतबार मात्रै फिल्म ‘रानीमहल’ साइन गरेकी हुन् । यो फिल्ममा यसअघि अभिनेत्री बर्षा शिवाकोटीले साइन गरेर घोषणा कार्यक्रममा समेत उपस्थित भएपश्चात ‘साइनिङ अमाउण्ट’ नै फिर्ता गरेकी थिईन् । अब उक्त जिम्मेवारी निकिताले आफ्नो काँधमा लिएकी हुन् ।

त्यसो त पछिल्लो केहि बर्षयता हेर्यो भने एकाएक मिस नेपालको क्राउन बिजेताहरु फिल्म अभिनयको लागी तयार हुँदै आएका छन् । पछिल्लो पटक मलिना जोशी, सृष्टि श्रेष्ठ, जेनिशा मोक्तान लगायत फिल्ममा आइसकेका छन् । यी मध्ये अभिनयबाट सफलता पाएकी र तारिफ भेटेकी पुर्व मिस नेपालको ट्याग पाएकी एक मात्र जस्तै अभिनेत्री सृष्टि मात्रै हुन् । त्यसैले निकिताको फिल्मी भविष्य कस्तो रहन्छ भन्ने कुरा केहि समयपछि मात्रै पत्ता लाग्नेछ ।

हिमाल न्यौपानेको निर्देशनमा बन्न लागेको फिल्मबाट निकितासँग रोमान्स गर्दै आशिष अधिकारीले अभिनयमा डेब्यू गर्दैछन् । स्कृप्ट लेखन दीपक पौडेलले गरेका छन् । नेपाली समाजमा प्रेमको प्रतिकको रुपमा चिनिँदै आएको ‘रानीमहल’को मुटुलाई फिल्मले बोल्ने भन्दै प्रेम के हो र स्थापित प्रेमको परिभाषा बुझाउने प्रयास यो फिल्मले गर्ने निर्माण टिमले बताएको छ । फिल्ममा नीर शाह, रश्मी भट्ट, बिएस राना, साहिल श्रेष्ठ, मानस्वी खरेल लिड रोलमा हुनेछन् ।