जान्नुहोस साम्राज्ञीको ‘तिमी सँग’ तीन दिने कलेक्सन (बक्स अफिस)
गत शुक्रबारबाट प्रदर्शनमा आएको फिल्म ‘तिमी सँग’ पछिल्लो पुस्ताकी चल्तीकी अभिनेत्री साम्राज्ञी राज्यलक्ष्मी शाह स्टारर फिल्म हो । पछिल्लो समयमा स्टारडम बोकेकी पहिलो दर्जाकी अभिनेत्रीको उपमा पाएकी साम्राज्ञीको यो फिल्मले कस्तो विजनेस गर्यो, हलमा उनको क्रेज कस्तो देखियो, दर्शक तथा शुभचिन्तकहरुमा कौतुहलताको विषय बन्नसक्छ ।
प्राप्त जानकारी अनुसार फिल्मले रिलिजको पहिलो तीन दिनमा ८५ लाखको ग्रस कारोबार गरेको छ । वितरक गोपालकाजी कायस्थले फिल्मको हालसम्मको कारोबार ८५ लाख दाबी सहित राजधानीमा फिल्मको कलेक्सन ४९ लाख र मोफसलमा ३६ लाखको बिजनेस गरेको बताए । कम हल पाएर पनि यो प्रकारको बिजनेसलाई राम्रो मानिएको छ ।
वितरक कायस्थले यो बिजनेसलाई उत्कृष्ट बताए । प्राप्त हलहरुमा सबैतिर दर्शकको उपस्थिती राम्रो रह्यो’, कायस्थले भने । साम्राज्ञीको क्रेज नै फिल्मले यो प्रकारको बिजनेस गर्नुमा पहिलो हतियार मानिएको छ । फिल्म प्रदर्शनको क्रममा साम्राज्ञी देश बाहिर रहिन् तर उनको नाममा हलमा दर्शकको उपस्थितीलाई राम्रो मानिँदै गर्दा अर्का अभिनेता नाजिर हुसेन खोज्ने दर्शक पनि हलमा भेटिए ।
फिल्ममा आकाश श्रेष्ठ पनि लिड रोलमा छन् । शिशिर राणाको निर्माण तथा निर्देशनमा बनेको फिल्मले यात्राको कथा बोल्छ । समिक्षकबाट फिल्मले मिश्रित प्रतिक्रिया पाएको छ । दर्शकले भने राम्रो बताएका छन् । मिडियाहरुमा यतिबेला साम्राज्ञीको भुमिकालाई भने कमजोर दाबी सहितका समाचारहरु बाहिर आइरहेका छन् ।
