फिल्ममा लाहुरेको पुनरागमन पक्का, खोले यस्तो रहस्य
नेपाली र्यापरमा नाम लिँदा आशिष राना ‘लाहुरे’ अग्र पङ्गतीमा आउने नाम हो । सामाजिक सञ्जालमा लाखौं फ्यान कमाएका लाहुरे जुनकुनै सामग्री लिएर दर्शक श्रोतामाझ आउँदै गर्दा लगातार जसो हिट हुन्छन् । उनै लाहुरे फिल्म अभिनयमा भने जम्न सकेनन् ।
तीन बर्ष पहिले जसो फिल्म ‘ताण्डव’बाट नेपाली ठुलोपर्दामा आएका लाहुरेले पहिलो फिल्मबाट नै असफल भए । तत्कालिन समयमा सर्वाधिक फ्यान फ्लोइङ भएका देखि चर्चाका सेलिब्रेटीको उपमासहित उनलाई मोहन डोटेलले हिरो बनाउन खोजे तर फिल्म चलेन । उल्टै डोटेल नै यतिबेला फिल्म मेकिङबाट विस्थापित जस्तै छन् । त्यसपछि लाहुरे अभिनयमा फर्केका छैनन् । पछिल्लो पटक ‘२ रुपैयाँ’ फिल्ममा उनले एक गीतमा भने आफुलाई प्रस्तुत गरेका थिए ।
अब भने लाहुरे पुनः फिल्म अभिनयमा फर्किने भएका छन् । शुक्रबार राजधानीमा आयोजित एक कार्यक्रममा मिडियाकर्मीसँगको अनौपचारिक कुराकानीमा लाहुरेले आफु ठुलोपर्दाको अभिनयमा फर्किँदै गरेको खुलाए । हिमालयन टेलिभिजनको रियालिटी शो ‘हिमालयन रोडिज’को पहिलो संस्करणको निर्णायक मण्डलका सदस्य लाहुरेले शुक्रबार नै घोषणा गरिएको उक्त शो को दोश्रो संस्करणको पनि निर्णायकको भुमिका निभाउँदै छन् ।
रंग पत्रकार सामिप्यराज तिमल्सिनाको जिज्ञाशामा जवाफ फर्काउँदै लाहुरेले भने, ‘फिल्म अभिनयमा फर्किने पक्का भएको छ, तर त्यसको लाागी केहि समय लाग्नेछ ।’ उनले ‘रोडिज’को दोश्रो संस्करण सकिएपछिको दुई महिना विभिन्न कार्यक्रममा व्यस्त हुने र त्यसपछि भने फिल्मको तयारीमा जुट्ने बताए ।
कुन र कस्तो कथाको फिल्ममार्फत आफुले पुनरागमन गर्ने भन्ने भने लाहुरेले खुलाउन चाहेनन् । फिल्म अभिनयमा फर्किने कुरा उनका फ्यान तथा शुभचिन्तकहरुको लागी खुशीको कुरा भए पनि त्यो तत्काल हुने भने देखिँदैन् । शुक्रबार मात्रै घोषणा भएको ‘हिमालयन रोडिज’को दोश्रो संस्करण सुरु भएर सकिन कम्तिमा ६ बढि महिना लाग्नसक्छ, त्यसपछिको दुई महिनाको पनि हिसाब गर्ने हो भने लाहुरेको अभिनय पर्दामा देख्नको लागी भने अबको १ बर्ष भन्दा बढि पर्खिनुपर्ने विकल्प हुनेछैन् ।
तश्विर श्रोतः गूगल
