प्रदिपसँग झुमे दर्शक, उपत्यका तताउँदै ‘लिलिबिली’ टिम
हप्ता दिन पहिले प्रचारात्मक कार्यक्रम सहित मोफसलको सांगितिक यात्रा सकाएर राजधानी फिरेको फिल्म ‘लिलिबिली’ ले उपत्यका तार्गेट गर्दै प्रचारलाई निरन्तरता दिएको छ । हालै गोंगबु स्थित बिजी मलमा कन्सर्ट सम्पन्न हुँदा सयौं दर्शकसँग फिल्म टिमले साक्षात गर्यो ।
लिड कलाकार प्रदिप खड्का, जसिता गुरुङ उपस्थित हुँदा उपस्थित क्राउडले हुटिङ र तालीले स्वागत गरे । युवा स्टारको ट्याग पाएका प्रदिपलाई नजिकबाट भेट्न पाउँदा खुशी साटे सेल्फी लिए । प्रदिप र जसितासँगै निर्देशक मिलन चाम्स, निर्माताद्वय सुदिप खड्का र गोविन्द शाही कार्यक्रममा उपस्थित थिए ।
बिजी मलको कन्सर्टलाई उपत्यका केन्द्रित कार्यक्रम अन्तर्गतको पहिलो बताएको निर्माण टिमले रिलिजसम्म उपत्यकाका काठमाडौँ, भक्तपूर र ललितपुर अन्य विभिन्न ठाउँमा गर्ने बताएको छ । फिल्ममा प्रदीप र जसिताका अलावा प्रियंका कार्की, अनुपबिक्रम शाही, सविन श्रेष्ठ, मनिष श्रेष्ठ, धुर्व दत्त, रितेश चाम्स लगायतका कलाकारको अभिनय छ ।
काफिया फिल्म्स्, सुदीप खड्का प्रोडक्सन र चाम्स इन्टरटेनमेन्टको व्यानरमा निर्माण भएको सिनेमामा गोविन्द शाही, सुदिप खड्का र निर्देशक चाम्सको लगानी छ । सिनेमामा अर्जुन जिसीको सम्पादन, चन्द्र पन्तको एक्सन र सुदिप बरालको छायाँकन छ । यहि चैत्र ३० गतेबाट फिल्म प्रदर्शनमा आउनेछ ।
