मोफसलमा ‘लिलिबिली’, विर्तामोडमा यस्तो देखियो प्रदिप क्रेज
चैत्र ३० लाई प्रदर्शन मिति तय गरेको फिल्म ‘लिलिबिली’ निर्माण टिम तथा कलाकार सहितको टोली यतिबेला प्रचार प्रसारको लागी मोफसल दौडमा छ । प्रदर्शन मिति नजिकिँदै गर्दा प्रचारलाई तिब्र बनाएको फिल्म टिमले मोफसलका विभिन्न शहरमा दर्शकसँग नजिकबाट साक्षात हुने किसिमले कन्सर्ट सहितका सांगितिक कार्यक्रम गरिरहेको छ । बिहिबार विर्तामोडमा पुग्दा सयौं दर्शकको साथ फिल्म टिमले पायो ।
बिहिबार दिउँसो आयोजित कार्यक्रममा अभिनेता प्रदिप खड्का आकर्षणका केन्द्र बने । पछिल्लो समय युवा स्टारको ट्याग पाएका प्रदिपलाई नजिकबाट भेट्न, देख्न तथा उनिसँगै तश्विर लिन दर्शकले तछाड मछाड गरे । उनको नाममा हुटिङ, ताली र सिट्ठी फुके ।
फिल्मीनेपाललाई प्राप्त तश्विरमा प्रदिपले एक सेल्फी लिँदै गर्दा देखिन्छन्, जहाँ उनको फ्रेममा दर्जनौं फ्यान तथा सुभचिन्तकहरु अटाएका छन् । विर्तामोडको जस्तै क्रेज यसअघि चितवनमा सम्पन्न कार्यक्रममा पनि देखिएको थियो । जुन कुराले नै ‘प्रेमगीत २’ पछि केहि महिनाको अन्तरमा पर्दामा आउँदै गरेका प्रदिप र उनको फिल्मलाई लिएर दर्शकहरु प्रतिक्षामा रहेको तथा उत्साहित रहेको स्पष्ट हुन्छ ।
प्रदिपसँगै अभिनेत्री जसिता गुरुङलाई पनि दर्शकले वाही वाही दिएको तथा प्रदिपसँगको जोडीलाई पर्दामा हेर्न उत्साहित भएको प्रतिक्रिया दिएका छन् । कार्यक्रममा नेपाल आइटल सेकेण्ड रनरअप प्रताप दासले नियमित रुपमा गीत मार्फत मनोरञ्जन प्रदान गरिरहेका छन् ।
मोफसल यात्रा सकाएर काठमाडौं फर्केपछि ‘लिलिबिली’ टिमले राजधानीमा पनि भव्य कार्यक्रम गर्ने बताएको छ । मिलन चाम्स निर्देशित फिल्मको यसअघि नै सार्वजनिक ट्रेलर तथा गीत संगीतले यतिबेला लोकप्रियता बढाउँदो छ । सुदिप खड्का र गोविन्द शाहीले यो फिल्म निर्माण गरेका हुन् ।
फिल्मका सबैजसो दृश्य युरोपमा खिचिएको छ । ‘लिलिबिली’मा प्रदिप र जसितासँगै प्रियंका कार्की, अनुपबिक्रम शाही, सविन श्रेष्ठ, ध्रुबदत्त लिड अभिनयमा छन् ।
