‘नाई नभन्नु ल ५’ सुभारम्भः निर्देशक भन्छनः ‘क्याप्टेन’सँग भिड्न तयार छु’
फिल्म ‘नाई नभन्नु ल ५’ सोमबारबाट फ्लोरमा जाने भएको छ । शनिबार राजधानीको मैतिदेवी मन्दिरमा स्कृप्ट र क्ल्याप पुजापछि निर्माण टिमले औपचारिक कार्य सुभारम्भ गरेको छ । निर्देशक तथा निर्माता विकासराज आचार्य, स्कृप्ट लेखक सामिप्यराज तिमल्सिना, कलाकार उत्तम केसी लगायतको टिम शनिबार बिहान मैतिदेवी मन्दिर पुगेको थियो ।
फिल्मको स्कृप्ट लेखनमा सामिप्यसँग निर्देशक आचार्यले पनि साझेदारी गरेका छन् । पुर्वी नेपाल तथा काठमाडौंमा खिचिने फिल्मको छायाँकन ३५ दिनमा सकाउने लक्ष्य निर्माण टिमले लिएको छ । पुरुषोत्तम प्रधानले खिच्ने फिल्ममा कोरियोग्राफी कविराज गहतराजको रहनेछ । सुदिप कुवंर मुख्य सहायक निर्देशक छन् ।
फिल्मममा अनुभव रेग्मी, अभिषेक नेपाल, स्वस्तिमा खड्का, सेडरिना शर्मा, प्रियका कार्की, केकी अधिकारी, दिलिप रायमाझी,उत्तम के सी , बुद्धि तामाड, जयनन्द लामा लगायतका कलाकार फिल्ममा लिड अभिनयमा रहनेछन् । पारिवारिक कथाको फिल्मका यसअघि रिलिज चार वटै सिक्वेल लोकप्रिय बनेका थिए ।
यसैबीच फिल्म निर्माण टिमले यसअघि तोकिएको आगामी भदौ ८ लाई मै आधिकारिक रिलिज बताएको छ । ‘नाइ नभन्नु ल ५’ र अर्का युवा स्टार अनमोल केसीको फिल्म ‘क्याप्टेन’ एकै मितिमा रिलिज हुने भन्ने समाचारहरु मिडियामा आउँदा कहिँकतै ‘नाई नभन्नु ल’को पाँचौ संस्करण उक्त मितिमा नआउने दाबी सहितका समाचार समेत बाहित आएका थिए ।
तर निर्देशक आचार्यले कुनै पनि हालतमा उक्त मितिमा फिल्म रिलिज हुने बताएका छन् । कुरा ‘क्याप्टेन’सँगको भन्दा पनि आफ्नो फिल्म सोहि मितिमा नै रिलिज गर्ने कार्यतालिका सहित काम सुरु गर्न लागेको भन्दै अन्य जुनकुनै फिल्म आउँदा पनि रिलिज नसर्ने आचार्यले बताए ।
