‘नाई नभन्नु ल ५’ कास्टिङ लाईनअप पुरा, आधिकारिक रिलिज घोषणा
‘नाई नभन्नु ल’ टाईटलमा लगातार चार वटा श्रृङ्खला हिट दिएका निर्देशक विकासराज यसै फिल्मको पाँचौ संस्करण निर्माणमा जुटेका छन् । यसै साताबाट फ्लोरमा जाने तयारी भइरहेको फिल्मको कास्टिङ लाइनअप पुरा भएको छ । फिल्ममका मुख्य कलाकारहरु सबै अनुबन्ध भएका छन् ।
प्राप्त जानकारी अनुसार फिल्मको लिड अभिनयमा अनुभव रेग्मी, प्रियंका कार्की, स्वस्तिमा खड्का, दीलिप रायमाझी, जयनन्द झा, उत्तम केसी, बुद्धि तामाङ, अभिषेक नेपाल रहने पक्कापक्की भएको छ। जहाँ अभिनेत्री प्रियंका कार्की अर्की अभिनेत्री स्वस्तिमाको आमाको भुमिकामा रहने बताईएको छ । यसअघि पनि यहि सिरिजको अघिल्लो संस्करणमा अनुभवको आमाको भुमिकामा प्रियंका थिईन् ।
यसैबीच फिल्मको रिलिज मिति पनि तय भएको छ । पछिल्ला लगातार दुई संस्करण नयाँ बर्षको छेकोमा रिलिज गरेका निर्देशक तथा निर्माता आचार्यले यो पटक फिल्मलाई भदौमा रिलिज गर्ने तयारी गरेका छन् । एफडी कम्पनिसँग वितरण सम्झौता भइसक्दा फिल्मको आधिकारिक प्रदर्शन मिति भाद्र ८ फाईनल भएको छ ।
