प्रियंका गर्भवती, कोहलपुरबाट बाहिरियो यस्तो रुप !
फिल्म कोहपुर एक्सप्रेस आगामी बैशाख १४ बाट रिलिज हुँदैछ । अभिनेत्री केकी अधिकारीको निर्माण डेब्यू यो फिल्मको ‘सिओडब्ल्यू काउ’ बोलको गीत यसअघि नै रिलिज भइसकेको छ । निर्माण टिमले एकहदसम्म यो गीतलाई दर्शकसम्म पुर्याउन सफल भईसकेको छ । यो बीचमा फिल्मको शिर्ष गीत रिलिज गरिएको छ ।
सार्वजनिक लिरिकल भिडियो गीतमा अभिनेत्री प्रियंका कार्की गर्भवती महिलाको अबतारमा देखिएकी छिन् । सार्वजनिक अचल दृश्य हेर्दा प्रियंकाले बुद्धी तामाङसँग जोडी बाँधेको आँकलन गर्न सकिन्छ । निर्मात्री समेत रहेकी केकी विनोद न्यौपानेको अपोजिटमा छिन् । भिडियोमा अर्की अभिनेत्री ऋचा शर्मा पनि अटाएकी छिन् । गीतको भिडियोले केहि हदसम्म पात्रहरुको हुलिया बोलेको छ ।
कालिप्रसाद बाँस्कोटाको शब्द, संगीत र स्वर रहेको गीतको भिडियोको एनिमेशन टौवा कृयसनको तर्फबाट विजय वस्यालले गरेका छन् । फिल्ममा रविन्द्र झा, कुशआग्र भट्टराई पनि लिड रोलमा छन् । विशाल भण्डारी फिल्मका निर्देशन हुन् भने अर्जुन तिवारीले खिचेको फिल्मका मुख्य निर्मातामा भद्रबहादुर शाही, देवनारायण न्यौपाने र शिव प्रसाद चौलागाईं छन् ।
