नेपालपछि सिड्नीमा श्वेताको ‘कान्छी’
गत शुक्रबारबाट नेपालमा सार्वजनिक प्रदर्शनमा आएको फिल्म ‘कान्छी’को अष्ट्रेलिया प्रदर्शन मिति तय भएको छ । श्वेता खड्काको निर्माणमा बनेको पारिवारिक तथा सामाजिक कथाको फिल्मको अष्ट्रेलियाको सिड्नी प्रदर्शन कन्फर्म भएको हो । यो फिल्म यहि फेब्रुअरी २४ र २५ मा सिड्नीबासी नेपालीमाझ स्पेशल स्कृनिङ हुँदैछ ।
फिल्मको अष्ट्रेलिया प्रदर्शनको अधिकार लिएका गोविन्द भण्डारीले प्रदर्शनको मुखमा फिल्मको प्रचार प्रसारलाई ब्यापकता दिइएको बताए । श्वेताको निर्माण तथा लिड अभिनय रहेको फिल्मलाई लिएर धेरै नेपालीहरु उत्साहित हुनुहुन्छ, भण्डारीले भने, ‘श्वेता जीको कमब्याक फिल्म अनि हाम्रै आफ्नै जन्म गाउँ ठाउँको कथा बोल्ने फिल्मलाई धेरैले माया दिनेमा आशावादी छौँ ।’
फिल्म उल्लेखित मितिमा परेको शनिबार र आईतबारको दिन सिड्नीको ईभेन्ट सिनेमाजमा स्कृनिङ हुनेछ । २४ फ्रेबुअरीमा सिड्नीको हर्सभिलको इभेन्ट सिनेमा र २५ फ्रेबुअरीमा बरउडको इभेन्ट सिनेमामा प्रदर्शन हुने प्राप्त जानकारीमा उल्लेख छ । फिल्मलाई आकाश अधिकारीले निर्देशन गरेका हुन् ।
श्वेतासँगै दयाहाङ राई, कामेश्वर चौरासिया, अनु शाह, भुमिका श्रेष्ठ, आशान्त शर्मा, नीर शाह, प्रज्वल सुजल गिरी लगायत लिड रोलमा रहेको फिल्मलाई पुरुषोत्तम प्रधानले खिचेका हुन् । शैलेश खड्का फिल्मका निर्माता हुन् ।
