भ्यालेन्टाइन उपहार, केकीको एक्सप्रेसमाथी प्रदिप हाबी !

प्रेम दिवस मानिने फेब्रुअरी १४ तार्गेट गरी दर्शक तथा फिल्म चिन्तकलाई उपहार भन्दै दुई फिल्मका गीत एक साथ रिलिज भए । अभिनेत्री केकी अधिकारीको निर्माणमा बनेको फिल्म ‘कोहलपुर एक्सप्रेस’ र प्रदिप खड्का स्टारर फिल्म ‘लिलिबिली’मा समावेश गीत एकसाथ रिलिज गरियो । सामाजिक सञ्जालमा यतिबेला यी दुबै कन्टेन्टले स्थान पाईरहेका छन् ।

तर रिलिजको भोलीपल्ट भईसक्दा केकीको फिल्म अनि उनै केकी स्टारर ‘अब मनसँग मन’ बोलको गीतमाथी लिलिबिली गीत हाबी भएको छ । ‘कोहलपुर एक्सप्रेस’को यो गीतलाई यो समाचार तयार पार्दासम्म ८० हजार पटक मात्रै युट्युवमा हेरिएको छ जबकी सँगसँगै जस्तो रिलिज भएको प्रदिप खड्का स्टारर ‘लिलिबिली’को ‘घुम्न जाउँ ईन्जिन गाडीमा’ बोलको टाइटल गीतलाई २ लाख ३० हजार बढि पटक हेरिएको छ ।

त्यसो त भ्यालेन्टाइनलाई विशेष प्राथमिकता दिँदै आएको पछिल्लो युवा पिढिँमाझ प्रदिप लोकप्रिय पनि छन् । जसकै कारण किशोर किशोरी तथा युवा युवतीको रोजाईमा परिसकेका युवा अभिनेता प्रदिप स्टारर गीतले युट्युवमा बढि साथ पाएको बताइन्छ । यो गीतलाई युट्युवमा १० हजार बढिले लाइक गरेका छन् भने हजार बढि प्रतिक्रिया व्यक्त छन् । अधिकांश कमेन्टमा प्रदिपलाई उनका युवती फ्यानहरुले ‘लभ सिम्बोल’ दर्शाएका छन् । प्रदिपसँगै फिचर जसिता गुरुङलाई पनि ‘क्युट’ लेखेका छन् ।

उता केकीसँगै विनोद न्यौपाने स्टारर ‘कोहलपुर एक्सप्रेस’को गीतमा २ हजार बढिले लाएक गर्दा २ सय ६० बराबर कमेन्ट पोखिएका छन् । अञ्जु पन्त र सुगम पोखरेलको स्वर समावेश मेलोडियस गीतलाई मन पराउँदा भिडियोमाथी मिश्रित प्रतिक्रिया व्यक्त छन् । यो फिल्मलाई विशाल भण्डारीले निर्देशन गरेका हुन् । केकी र विनोदसँगै प्रियंका कार्की, रविन्द्र झा, ऋचा शर्मा,वुद्धि तामाङ फिल्मका लिड कलाकार हुन् ।

‘लिलिबिली’ मिलन चाम्सको निर्देशनमा तयार भएको फिल्म हो । सुदिप खड्का र गोविन्द शाहीले निर्माण गरेको फिल्ममा प्रदिप र जसितासँगै अनुबिक्रम शाहि, प्रियंका कार्की, सविन श्रेष्ठ, मनिष श्रेष्ठ, ध्रुवदत्त लगायत लिड अभिनयमा छन् । यो फिल्म चैत्रमा रिलिज हुँदैछ ।