‘जय भोले’ निर्माण घोषणा, स्वस्तिमाको रोमान्स को सँग ?
फिल्म ‘जय भोले’ को निर्माण घोषणा भएको छ । राजधानीको एक तारे होटलमा आयोजित कार्यक्रमका बीच निर्माण टिमले कमेडी जनरामा बन्ने गरी ‘जय भोले’ फिल्मको घोषणा गरेको हो । फिल्मलाई भैट्रान निर्माता, निर्देशक अशोक शर्माले बनाउनेछन् ।
फिल्ममा खगेन्द्र लामिछाने, सौगात मल्ल, स्वस्तिमा खड्का, सलोन बस्नेत, राजाराम पौडेलसँगै निर्देशक शर्मा लगायत लिड रोलमा हुनेछन् । फिल्मको कथा तथा पटकथा पनि खगेन्द्रले नै लेखेका छन् । जेनेरेशनको हिसाबमा स्वस्तिमा खड्का र सलोनले फिल्ममा जोडी बाँध्ने अनुमान छ । मितिनी फिल्म निर्देशनको १२ बर्षपछि शर्मा पुनः फिल्म निर्देशनमा होमिएका हुन् ।
फिल्म वर्ल्ड प्राली र एए ग्रुप अफ कम्पनिजको ब्यानरमा बन्ने फिल्मलाई ह्यूमर एवं सोसियल ड्रामा जनरामा राखिएको छ । दुई केटा साथीबीचको भावनात्मक मित्रता र प्रेमको कथा फिल्मले बोल्नेछ । पुराना निर्माताको उपमा पाएका शर्माले अब बन्ने फिल्मले नयाँ र पुराना दुबै पुस्तालाई फ्युजन गर्ने बताए ।
अभिनेता खगेन्द्र लामिछानेले फिल्मको कथालाई अल्ट्रा मोडर्न नबुझ्न आग्रह गर्दै सिटी कथामा फिल्म बन्न लागेको बताए । अभिनेत्री स्वस्तिमा खड्का ‘जय भोले’लाई लिएर उत्साहित देखिइन् । स्टारकास्टसँगै काम गर्न पाउँदा आफुले सिक्ने समेत अबसर पाउने भन्दै उनले सक्दो राम्रो मेहनत गरेर दर्शकमाझ आउने विश्वास व्यक्त गरिन् ।
१ करोड ६० लाख बजेट बताइएको फिल्मलाई पुरुषोत्तम प्रधानले खिच्नेछन् । राजनराज शिवाकोटी र कल्याण सिंहको संगीत रहने फिल्मलाई राजु ढुङ्गानाले सम्पादन गर्नेछन् । वसन्त श्रेष्ठले नृत्य निर्देशन गर्नेछन् भने द्वन्द्व रोशनविक्रम भट्टराइको रहनेछ ।
यसैबीच फिल्मको रिलिज मिति अर्को बर्षको दशैंलाई घोषणा गरिएको छ । उक्त मितिमा यसअघि नै ब्लकवस्टर सिक्वेल ‘छक्कापञ्जा ३’ रिलिजको घोषणा भइसक्दा तोकिएको ‘जय भोले’ रिलिजले कमेडी भर्सेज कमेडी ड्रामाको भिडन्त पक्का गरेको छ ।
