अनुपबिक्रमको अर्को फरक अबतार, ‘हुर्रे’ ट्रेलरमा देखियो यस्तो रुप (भिडियो)
खलपात्रको परिचयबाट उदाएका अनुपबिक्रम शाहि यतिबेला हिरो अनि ‘भिलेन’ दुबै पात्रमा फिट छन् । उनले अभिनय गर्ने जुनसुकै रुप तथा अबतारलाई दर्शकले ‘वाउ’ भन्दै आएका छन् । त्यसैले त यतिबेला उनको खोजी र रोजी फिल्म उद्योगमा बढिरहेको छ ।
केहि महिना पहिले सार्वजनिक ‘कमलेको बिहे’ फिल्मको ट्रेलरमा हालसम्मकै भिन्न अबतारमा देखिएका अनुप यो पटक पुनः सोहि प्रकारको ‘योङ्ग पण्डित’ अबतारमा प्रस्तुत छन् । पछिल्लो पटक सार्वजनिक ‘हुर्रे’ फिल्मको ट्रेलर यहि बोल्छ । ट्रेलरमा उनलाई जोगीको भेषमा भेट्न सकिन्छ ।
अभिनेत्री केकी अधिकारीको प्राप्तीको लागी दुई अभिनेता राजाराम पौड्याल र अंकित खड्का लागिपर्दा अनुप पनि त्यसको एक हिस्सा जस्तो देखिन्छन्, उनको अंगालोमा केकी पनि बेरिएकी छिन् । फिल्मले कमेडीस्वाद पस्किन्छ । यम थापा यो फिल्मका निर्देशक हुन् । ट्रेलरमा विजय बराल अर्की अभिनेत्री संगीता नापितको प्रेम प्राप्तीको लागी दौडिरहेका छन् ।
कालिप्रसाद बाँस्कोटा र राजनराज शिवाकोटीको संगीत रहेको फिल्मलाई शिव ढकालले खिचेका हुन् । दावा लामा ‘सेट्टी’,सोनम लामा ‘ब्लोन’ र छिरिङ दोर्जे लामा फिल्ममा निर्माता छन् । फागुन २५ बाट यो फिल्म दर्शकमाझ आउनेछ ।
(अनुपको पछिल्लो समयको परिवर्तित क्यारेक्टर र करियर विशेष कुराकानी सहितको सामग्री फिल्मीनेपालमा छिट्टै प्रकाशित हुँदैछ)
