पलको नयाँ फिल्मलाई ‘शत्रु गते’ बाधक !
चकलेटी लुक्सका धनी पल शाह एक समय म्युजिक भिडियोमा जत्तिकै व्यस्त थिए, उनलाई आफ्नो आफ्नो भिडियोमा खेलाउन निर्देशक निर्माताको मात्र होइन सँगै स्कृन सेयर गर्न मोडलहरुको पनि लाम लाग्थ्यो । यतिबेला उनले म्युजिक भिडियोको अभिनयलाई कम गर्दै गइरहेका छन् फिल्म अभिनयमा जम्नको लागी ।
सुरुवाती दुई फिल्म सफल दिएका पललाई ‘जोनी जेन्टलमेन’ले धक्का दियो । तर उनको खोजी कमी भएको छैन् । यतिबेला पललाई आफ्नो फिल्ममा लिन माथी उल्लेख गरिएको म्युजिक भिडियोमा जस्तै फिल्म निर्माता निर्देशकहरु पनि उत्तिकै लाग्छन् । तर उनलाई नयाँ फिल्ममा काम गर्नको लागी भने करियरको चौथो फिल्मको रुपमा चैत्रमा आउँदै गरेको ‘शत्रु गते’ ले बाटो छेकेको छ ।
पछिल्लो पटक पलले आफुलाई अफर गर्ने निर्माता निर्देशकहरुलाई ‘शत्रु गते’ रिलिजपछि मात्र निर्णय दिने जवाफ फर्काउँदै आएका छन् । रिलिजको लागी दुई महिना मात्र बाँकी रहँदा त्यस फिल्मको रिजल्ट अनि आफुले उक्त फिल्ममा निभाएको कामप्रतिको परिणाम हेरेर मात्रै नयाँ फिल्म ‘साइन’ गर्ने बचन पलले दिँदै आएको उनि समक्ष पुगेका फिल्मकर्मीहरु बताउँछन् ।
अर्को तर्फ जानकारीमा आए अनुसार ‘शत्रु गते’मा पलको कुनै ठुलो (स्ट्रोङ) रोल छैन् । त्यसो त भेट्रान मानिँदै आएका मह जोडी सहित दर्जन बराबर हाँस्य कलाकारहरुको अभिनय समावेश फिल्ममा पल छायाँमा पर्नसक्ने अनुमान पनि धेरैको छ । त्यसैले त उनले ‘शत्रु गते’ पर्खेको बहानामा राम्रा स्कृप्टलाई साइड लगाउनु उनकै लागी घाटा हुने तर्क चलिरहेको छ । प्रदिप भट्टराईले ‘शत्रु गते’मा पललाई एक्सन कट गरेका छन् । पछिल्लो समय लभ अफेयरको चर्चामा जोडिँदै आएको पल र आँचल शर्माको जोडी यो फिल्ममा पनि एकसाथ देखिँदैछ ।
