मोफसलमा ‘पिंजडा ब्याक अगेन’ रिलिज, प्रिमियरमा दर्शकबाट तारिफ
राजधानी बाहिर आज (बिहिबार) बाट प्रदर्शनमा आएको तथा उपत्यकामा शुक्रबारबाट प्रदर्शनमा आउने फिल्म ‘पिंजडा ब्याक अगेन’ले रिलिजको पुर्वसन्ध्यामा गरिएको प्रिमियरमा उत्कृष्ट प्रतिक्रिया पाएको छ । प्रिमियरमा फिल्म हेर्ने अधिकांश दर्शकले फिल्मलाई राम्रो भने, अभिनेता निखिल उप्रेती र अभिनेत्री सारा शिर्पालीको कामको खुलेर तारिफ गरे ।
‘रुद्र’ डेब्यू गर्ल साराको कामलाई फिल्म हेर्ने सबैजसो दर्शकले उत्कृष्ट ठहर गरे । दोश्रो फिल्मसम्म आइपुग्दा उनले गरेको अभिनय अनि मेहनतलाई सबैले तारिफ गरेका हुन् । फेमिली ड्रामा सँगसँगै एक्सन प्याक फिल्मलाई विसुद्ध नेपाली फिल्मको ट्याग प्रिमियरमा फिल्म हेर्ने फिल्मकर्मी, मिडियाकर्मी तथा अन्य दर्शकहरुले दिएका छन् ।
१७ तलाबाट हाम फालेर नयाँ रेकर्ड बनाएका अभिनेता निखिल र सारासँगसँगै फिल्ममा प्रहरीको भुमिका निभाएका भोलराज सापकोटाका कमेडी पञ्चलाईन र खलपात्रको रुपमा प्रस्तुत पुकार भट्टराईको काम पनि तारिफयोग्य देखिएको छ ।
पछिल्ला समय रिलिज भएका एक्सन स्टार निखिल उप्रेती अभिनित सबैजसो फिल्म भन्दा फरकपना यो फिल्मले बोकेको छ । लामो समयसम्मको द्वन्द्व निर्देशनको अनुभवलाई प्रयोग गर्दै ठुलोपर्दाको पुर्ण फिल्म निर्देशनमा होमिएका हिमाल केसीले आफ्नो ठाउँबाट दिलोज्यान दिएर २ घण्टा लामो फिल्मलाई मनोरञ्जनको राम्रो खुराकको रुपमा प्रस्तुत गरेका छन् ।
श्रीराम बराल प्रस्तुतकर्ता रहेको फिल्ममा रोहित पुरी र गोविन्द गैरे निर्मातामा छन् । उल्लेखित कलाकारसँगै सुस्मिता केसी, ज्याक श्रेष्ठ, सुशान्त श्रेष्ठ, दिवंगत अभिनेत्री विना थापा लगायतको मुख्य अभिनय छ । फिल्मलाई काठमाडौं उपत्यकामा बिके फिल्मस् र मोफसलमा एफडी कम्पनिले वितरणको जिम्मा लिएको छ ।
प्रिमियर प्रतिक्रिया भिडियोमा हेर्नुहोसः
