युरोपमा यसरी खिचिएको थियो बुद्धि, पवित्रा र गौरवको होलिडे (फोटो फिचर)
पछिल्लो समय नेपाली फिल्मको बजार बिस्तार हुँदै जाँदा डायस्पोरामा फिल्मांकनको क्रम बढ्दो छ । युरोप, अष्ट्रेलिया अमेरिका देखि अरबी मुलुकहरुमा नेपाली फिल्महरु छायाँकन हुन थालेका छन् । पछिल्लो पटक यसैको एक उदाहरण बनेको फिल्म ‘होलिडे’को सम्पुर्ण छायाँकन युरोपमा गरिएको छ ।
हालै उक्त फिल्मसँग सम्बन्धित केहि तश्विरहरु बाहिर आएका छन् । युरोपको सुन्दर लोकेशनमा अभिनेता गौरव पहारी, बुद्धी तामाङसँगै अभिनेत्री पवित्रा आचार्यका रोमान्टिक अबतारहरु बाहिर आएका हुन् ।
अर्को बर्षको बैशाख जेठको छेकोमा फिल्म रिलिजको तयारी गरेको निर्माण टिमले प्रचारात्मक कन्टेन्ट भन्दै फिल्मका अचल दृश्यहरु बाहिर ल्याएको हो । कमेडी ड्रामा बोल्ने फिल्मलाई बसन्त निरौलाले निर्देशन गरेका छन् । देश बाहिर फिल्म खिच्नु कहिल्यै पनि सहज नहुने भन्दै निरौलाले बेल्जियम बस्दै आएका अभिनेता श्याम श्रेष्ठ लयागतको सहयोगमा यो सबै सफलता हातमा आएको भन्दै श्यामलाई धन्यबाद बोले । युरोप छायाँकनमा सहजता ल्याउन श्यामसँगै बेनि ढुङ्गाना, तेजेन्द्र कंडेल र हरी कार्कीले निरौलाको टिमलाई साथ दिएका थिए । श्याम र बेनि यो फिल्मका लिड कलाकार मध्येका दुई हुन् ।
फिल्मलाई बेल्जियम र फ्रान्सका रमणिय लोकेशनमा छायाँकन गरिएको छ । अभिमन्यू निरवीले लेखेको कथामा तयार फिल्ममा मन्दिरा श्रेष्ठ, हरी कार्की, तेजेन्द्र कंडेलले निर्माणमा साझेदारी गरेका छन् भने दिनेश कालिराज कार्यकारी निर्माता छन् ।
बी.एन फिल्मस् को ब्यानरमा बनेको फिल्ममा संगीत अमित श्रेष्ठ र युवराज चौलागाईंको छ । कोरियोग्राफी अभिनेत्री पवित्राले नै गरेकी छिन् । फिल्ममा समावेश पहिलो गीत छिट्टै नै सार्वजनिक गर्ने निर्देशक निरौलाले बताए ।
