अनमोल हिरोइन अदितीले रोजिन् प्रदिप र आशिरमान !
रिलिज मिति नजिकिँदै गर्दा दर्शक तथा फिल्म चिन्तकहरु युवा स्टार अनमोल केसी स्टारर फिल्म ‘कृ’लाई लिएर जति उत्साहित छन् त्यति नै यो फिल्मबाट नेपाली रजतपटमा डेब्यू गर्दै गरेकी संभावनावान अभिनेत्री अदिती बुढाथोकीको अभिनय कलाको पर्खाइमा पनि ।
पछिल्लो केहि महिनायता नेपाली तथा भारतिय मिडियामा स्पेस लिइरहेकी यी सुन्दरीको ठुलोपर्दाको डेब्यू फिल्म ‘कृ’ रहे पनि अभिनय कला भने यसअघि नै करोडौंले हेरिसकेका पञ्जाबी तथा हिन्दी गीतहरुमा पोखिसकेकी छिन् । आकर्षक जिउडाल तथा व्याक्तित्वको कारण अनि ट्रेलरमा जोडिएको अभिनयले चर्चा बढाउँदै जाँदा आइतबार पहिलो पटक सार्वजनिक रुपमा मिडियासामु खुलिन् ।
राजधानीमा आयोजित ‘मिट एण्ड ग्रिट’मा मिडियाकर्मीमाझ आफ्ना मोडलिङ अनुभव सुनाईन् । अनमोल केसीसँग काम गर्नु ठुलो कुरा रहेको बताउँदा अनमोल भएकै कारण ‘कृ’ फिल्म नगरेको तर्क पनि गरिन् । कथावस्तुले आकर्षण गरेकै कारण यो फिल्म गरेको बताएकी अदितीले मुम्बई बस्दै आउँदा भारतिय भनेर लागेको आरोपलाई पनि चिरिन् ।
मोडलिङ एजेन्सीसँगको अनुबन्धनका कारण नै नेपाल भारत गरिरहनु परेको बताउँदै आदितीले आफु नेपाली नागरिक रहेको भन्दै पहिलो प्राथमिकता नेपाल रहने बताइन् । छिट्टै नै भारतको तलेगु फिल्ममा डेब्यू गर्न लागेको खुशीको सन्देश सुनाएकी अदितीले बलिउडकी स्टार अभिनेत्री दीपिका पादुकोणको अभिनयबाट आफु प्रभावित रहेको बताईन् ।
कार्यक्रम चल्दै जाँदा मिडियाकर्मीबाट प्रश्व तेर्सियो, स्टार अभिनेता अनमोलसँग त काम गर्नुभयो अब नेपालको कुन अभिनेतासँग स्कृन सेयर गर्ने मन छ ? प्रश्न सकिँदै गर्दा उनले जवाफ फर्काईन्, ‘प्रदिप खड्का र आशिरमान देशराज जोशी’ । अदितीको रोजाईमा परेका प्रदिप अनमोलपछिका स्टारको रुपमा कहलिइसकेका छन् भने आशिरमानले पहिलो फिल्म रिलिज पछि नै संभावनावान स्टारको ट्याग पाइसकेका छन् । अदितीको डेब्यू फिल्म ‘कृ’ माघ २६ बाट दर्शकमाझ आउँदैछ ।
