‘पिंजडा ब्याक अगेन’ रिलिज मिति फेरबदल
माघ चार बाट प्रदर्शनमा आउने घोषणा भएको एक्सन स्टार निखिल उप्रेती स्टारर फिल्म ‘पिंजडा ब्याक अगेन’को रिलिज मिति फेरबदल भएको छ । अब माघ चारमा यो फिल्म उपत्यका बाहिर मात्रै प्रदर्शन हुनेछ । काठमाडौं उपत्यकामा माघ पाँच गतेबाट फिल्म हलमा लाग्नेछ ।
यसअघि चलचित्र निर्माता संघले अघिल्लो हप्ता रिलिज हुने फिल्मको लागी होल्ड ओभर कायम राख्न र प्रदर्शनरत फिल्मलाई कम्तिमा एक हप्ता हलमा टिकाइराख्ने निर्णय सहित अघि ल्याएको मुद्धालाई आत्मसाथ गर्दै ‘पिंजडा ब्याक अगेन’ राजधानी आसपासका हलमा शुक्रबार मात्रै रिलिज हुने भएको हो ।
माघ चार गते बिहिबार परेको सोनाम ल्होसारको बिदाको दिन फिल्म रिलिजको घोषणा निर्माण टिमले गरेको थियो । त्यसो त यसअघि पनि बिदा पर्दै गर्दा बिहिबार नै फिल्महरु हलमा लाग्दै आएका छन् । यो कुरा मुख्यतः मोफसलका हलमा मात्रै लाग्दै आएको छ । निर्देशक हिमाल केसीले वितरण कम्पनिहरुसँगको सल्लाहमा फिल्मलाई दुई मितिमा रिलिज गर्ने सहमती भएको बताए ।
श्रीराम बरालको प्रस्तुतीमा तयार भएको फिल्ममा गोविन्द गैरे र रोहित पुरी निर्माता छन् । फिल्मलाई राजधानीमा बिके फिल्मस् र मोफसलमा एफडी कम्पनिले वितरणको जिम्मा लिएको छ । निखिलसँगै सारा शिर्पाली, ज्याक श्रेष्ठ, सुन्दर श्रेष्ठ, पुकार भट्टराई, सुस्मिता केसी लगायत लिड रोलमा छन् । यसअघि सार्वजनिक गीत संगीत र ट्रेलरका कारण फेमिली ड्रामा बोल्ने एक्सनप्याक फिल्म चर्चामा छ ।
