रिलिजको २४ घण्टामै ‘शत्रुगते’को रुपै मोहनीले राख्यो नयाँ रेकर्ड
नयाँ बर्ष २०१८ को छेकोमा रिलिज भएको फिल्म ‘शत्रुगते’को रुपै मोहनी बोलको गीतले रिलिजको २४ घण्टामै नयाँ किर्तिमान बनाएको छ । फिल्मको उक्त गीतलाई हालसम्म ८ लाख ४० हजार बढिले हेरेका छन् । यो भ्यूज कुनै पनि नेपाली फिल्मको गीतले यति छिटो समयमा बनाएको पहिलो पटक हो ।
टंक बुढाथोकी र मिना निरौलाको स्वर रहेको गीतमा टंकको नै संगीत छ । शब्द लोकराज अधिकारीले लेखेका हुन् । गीतमा तीन जोडीको रुपमा पल शाह आँचल शर्मा, हरिवंश आचार्य दिपाश्री निरौला तथा दिपकराज गिरी र प्रियंका कार्की फिचरिङमा छन् । कविराज गहतराजको निर्देशनमा तयार भएको गीतलाई दिर्घ गुरुङले खिचेका हुन् ।
गीत यतिबेला नेपाली युट्युव ट्रेण्डिङको दोस्रो स्थानमा छ । यो गीत भन्दा पहिले यसअघि रिलिज फिल्म ‘छक्का पञ्जा २’ को ‘नाइलनको साडीमा’ ८ लाख पटक हेरिएको रेकर्ड थियो । प्रदिप भट्टराईको निर्देशनमा बनेको फिल्म चैत्र ९ गतेबाट दर्शकमाझ आउँदैछ ।
फिल्मलाई मह सञ्चारले निर्माण गरेको हो । उल्लेखित कलाकारहरुसँगै शिवहरी पौड्याल, बसुन्धरा भुषाल, रमेशरञ्जन झा, मोहित आचार्य लगायत लिड अभिनयमा छन् ।
