जस्मिनसँग सौगातले बाँधे जोडी, यस्तो बनेर आयो ‘पञ्चेबाजा’ गीत
न्यू भेनस फिल्मस् को ब्यानरमा तयार फिल्म ‘पञ्चेबाजा’मा समावेश पहिलो गीत रिलिज गरिएको छ । सार्वजनिक लोक फ्लेभरको गीतमा लिड अभिनेता सौगात मल्लले अभिनेत्री जस्मिन श्रेष्ठसँग कम्मर मर्काएका छन्, जोडी बाँधेका छन् ।
‘घिन घिन मादल..’ बोलको गीतमा स्वर अञ्जु पन्त र डेविड शंकरको छ भने संगीत विकास चौधरीले भरेका छन् । गीतको शब्द फिल्म लेखक समेत रहेका प्रदिप भारद्वाजले लेखेका हुन् । कविराज गहतराजले कोरियोग्राफी गरेका छन् ।
हरी घले लामाको छायाँकन रहेको फिल्मलाई घनश्याम लामिछानेले निर्देशन गरेका छन् । आफ्नो निर्देशनमा मौलिक प्यसटनको फिल्म बनाउन रुचाउने लामिछानेले यो फिल्म पनि सोहि जनराको निरन्तरता रहेको बताए । लोप हुँदै गएको ‘पञ्चेबाजा’लाई जोडेर त्यसमा माया प्रेम र नेपाली समाजको यथार्थता समेट्दै फिल्म तयार गरेको उनले बताए ।
सौगात र जस्मिनसँगै बुद्धि तामाङ, कर्मा शाक्य, सृजना सुब्बा, प्रकाश घिमिरे, प्रमिला तुलाचन, बिमला गिरी लिड अभिनयमा रहेको फिल्मलाई राजेश शाहीले निर्माण गरेका हुन् । सारा गुरुङ फिल्ममा सह निर्मात्रीमा छिन् । आउँदो फागुन ११ मा फिल्म रिलिज हुनेछ ।
