माघ २६ बाट सर्यो ‘कान्छी’, ‘कृ’लाई सोलो रिलिज अबसर

यसअघि अनमोल केसी स्टारर फिल्म ‘कृ’ र श्वेता खड्काको अभिनय तथा निर्माण रहेको फिल्म ‘कान्छी’ एकै मितिमा रिलिजको समाचारले मिडिया तथा सामाजिक सञ्जालमा चर्चा पाएको थियो । अन्ततः फिल्म ‘कान्छी’ रिलिज सरेको छ । उक्त मितिमा ‘कृ’ सोलो रिलिज हुनेछ ।

श्वेता खड्काले फिल्मको नयाँ प्रदर्शन मिति ‘कृ’ रिलिजको एक हप्तापछि अर्थात फागुन ४ लाई तोकेकी छिन् । दुबै फिल्मको निर्माण टिम तथा वितरकहरुको सहमतिमा फिल्म एक हप्तापछि मात्रै रिलिज गर्ने निर्णय भएको बताइएको छ । तर श्वेताले भने ‘कृ’ निर्माण टिम छलफलको लागी सम्म तयार नभएको भन्दै दुबै निर्माताको हितको लागी आफुले रिलिज सारेको दाबी गरेकी छिन् ।

आकाश अधिकारी निर्देशित फिल्म ‘कान्छी’मा श्वेतासँगै दयाहाङ राई, प्रज्वल सुजल गिरी लगायत मुख्य भूमिकामा छन् । फिल्मको यसअघि रिलिज ‘चरी चट्ट परी’ बोलको गीतले युट्युवमा ५० लाख भ्यूज को माइलस्टोन पुरा गरेको छ ।