प्रदिपको फिल्ममा आमा बन्दै प्रियंका
केहि दिन पहिले फिल्म ‘लिलिबिली’मा युवा स्टार अभिनेता प्रदिप खड्काको अपोजिटमा अभिनेत्री प्रियंका कार्की अनुबन्ध भएको खबरले चर्चा पायो । गसिप बजारमा यो प्रकारका अनेकन समाचारहरु बाहिर आए । अब भने नयाँ सुचना बाहिरिएको छ कि फिल्ममा प्रदिप र प्रियंकाले एक आपसमा रोमान्स गर्दै छैनन् ।
विश्वस्त श्रोतलाई आधार मान्ने हो भने ‘लिलिबिली’मा प्रियंका बच्चाको आमाको भुमिकामा हुनेछिन् । त्यसो त यसअघि फिल्मीनेपालसँगको कुराकानीमा पनि अभिनेता खड्काले आफ्नो अपोजिटमा प्रियंका नरहने कुरा क्लियर गरिसकेका थिए । अब पक्का यो भएको छ कि फिल्ममा प्रदिप र प्रियंका कहिँकतै सँगै देखिँदै छैनन् यदि सँगै हुँदा पनि रोमान्सपुर्ण दृश्य दर्शकले देख्ने छैनन् ।
यसअघि निर्माण घोषणाको क्रममा लिड अभिनेत्री भनिएकी रेबिका गुरुङ आउट भएपछि उनको ठाउँ प्रियंका आएकी थिइन् । प्रदिपसँग अपोजिटमा यतिबेला जसिता गुरुङ छिन् । फिल्मको छायाँकन गत साताबाट सुरु भईसकेको छ ।
मिलन चाम्स निर्देशित फिल्मको केहि महिना पहिले तामझामका साथ राजधानीमा आयोजित एक कार्यक्रमका बीच औपचारिक घोषणा गरिएको थियो । जुन समयमा अभिनेता खड्का तथा अभिनेत्री द्वयलाई प्रदान गरिएको सुरक्षा गार्डको कारण फिल्मले लामो समयसँग चर्चा बटुलेको थियो । फिल्मको सम्पुर्ण छायाँकन युरोपमा हुँदैछ ।
