अनमोललाई ५० लाखको अफर

अनमोल केसी, नामै काफी छ । हो, नेपाली फिल्म उद्योगको लागी अनमोल केसी ब्राण्ड भइसकेका छन् । नेपाली फिल्म हेर्ने, जान्ने बुझ्ने सबैको लागी अनमोलको बारेमा धेरै कुरा बताइरहन पर्दैन् । पछिल्लो समय नेपालमा कोहि कलाकारको स्टारडम बिक्छ भने त्यो स्टार अनमोल नै हुन् ।

पहिलो फिल्म ‘होस्टेल’पछिका लगातार चार फिल्म हिट दिएका अनमोल हजारौं युवतीका ढुकढुकी हुन् । उनको रिलिजको क्रममा रहेको फिल्म ‘कृ’ यतिबेला चर्चामा छ नै यो बीचमा केहि दिन पहिलेदेखि मिडियामा आइरहेको उनले गर्न लागेको नयाँ फिल्मको खबरले पनि सिने नगरी गर्माएको छ । पाँचौं फिल्म ‘कृ’ गरेका यी अभिनेता त्यसपछि होम प्रोडक्सनमा पीता भुवन केसीले निर्माण गर्न लागेको अनटाइटल प्रोजेक्टमा काम गर्दैछन् । जुन फिल्मको कथा यतिबेला सामिप्यराज तिमल्सिनाले लेखिरहेका छन् ।

नेपाली फिल्म उद्योगका सर्वाधिक महँगा यी अभिनेताले ‘कृ’ फिल्मको लागी २० लाख पारिश्रमिक लिएको कुराले फिल्म क्षेत्र तताएको थियो । जुन चर्चा परिचर्चाकै कारण अनि ‘कृ’मा समावेश उनको लुक्स सार्वजनिक भइसक्दा देखि नै यो फिल्म हिट भइसकेको ब्याख्या समेत हुन थालिसकेको छ ।

यहाँ हामी जोड्दैछौं, उनै अनमोललाई अफर गरिएको नयाँ पारिश्रमिकको । यतिबेला केहि निर्माता निर्देशकहरु एउटा फिल्म निर्माण हुनेसम्मको पारिश्रमिकको अफर लिएर अनमोल समक्ष पुगेका छन् । जानकारीमा आए अनुसार अनमोललाई एक फिल्म खेल्न ५० लाख पारिश्रमिकको अफर गरिएको छ ।

लगानी गर्दा सुरुवाती दिनमा नै सुरक्षित महसुस कोहि कलाकारबाट हुन्छ भने त्यो नाम अनमोल मात्रै हुन् । जसका कारण पनि उनलाई आफ्नो फिल्ममा अनुबन्धन गर्न धेरै निर्माता निर्देशकहरु लालायित छन् । यसअघि अनमोललाई ३० लाखसम्मको अफरको चर्चा चलेको थियो । अब भने ५० लाख दिन नै फिल्मकर्मीहरु तयार भएका हुन् ।

अनमोललाई निर्देशक सिमोस सुनुवार र अभिनेत्री, निर्मात्री तथा निर्देशक समेत रहेकी झरना थापाले ५० लाख सम्म पारिश्रमिक दिने अफर गरेको निकट श्रोत बताउँछ । यी नाम सँगसँगै ‘कृ’ निर्देशक सुरेन्द्र पौडेलले पनि आफ्नो नयाँ प्रोजेक्टमा अनमोललाई ५० लाखसम्म दिन तयार भएको जानकारीमा छ । यी सबैको अफरमा अनमोल भने सिधा राजी छैनन् ।

मोटो रकम आउनासाथ फिल्म खेलि हाल्ने स्टारडम अनि हिट र फ्लपमा मतलब नराख्ने धेरै अभिनेताहरुलाई धावा बोल्दै आएका अनमोलले हरेक पटक पारिश्रमिकको भन्दा राम्रो कथा, राम्रो टिम र स्तरिय फिल्मको पक्षमा आफुलाई उभ्याउँदै आएका छन् । अब हेर्न बाँकी छ ५० लाख पारिश्रमिक पेस गर्ने निर्माता निर्देशकले अनमोलको मन जित्ने स्कृप्ट पेस गर्न सक्छन् या सक्दैनन् ।

यो पनिः

अनमोलले स्विकारे ५० लाखको अफर