फर्स्टलुकमा यस्तो देखियो रजनीको ‘पटुकी’

पौष २१ लाई प्रदर्शन मिति तय गर्दै फिल्म ‘पटुकी’ युनिट प्रचारमा निस्केको छ । शनिबार फिल्मको फर्स्टलुक पोस्टर रिलिज गरियो । सार्वजनिक पोस्टरमा लिड कलाकारहरुलाई भेट्न सकिन्छ । ‘परदेशी’ गर्ल रजनी केसी यो फिल्ममा लिड अभिनेत्री छिन् ।

रजनीसँगै जेम्स बिसी, दीपिका कँडेल, रोजी श्रेष्ठ र हरि थापा प्रमुख भूमिकामा रहेको फिल्मलाई राम नेपालले निर्देशन गरेका हुन् । आशुतोष फिल्मस् सँग  सहकार्य गर्दै मनसुधा मिडियाले निर्माण गरेको फिल्ममा प्रस्तुतकर्ता म्याक्तेन कालु छन् । सीता मिजार कार्यकारी निर्माता छन् ।

एक्सन लभ स्टोरी जनराको फिल्ममा राजनराज शिवाकोटीको संगीत छ भने क्यामेरा लक्ष्ण घिमिरेले चलाएका छन् । सानुकुमार महर्जनको द्वन्द्व तथा शिव विकको नृत्य समावेश छ ।