हट साराको प्रेममा निखिल, सिउँदो भर्ने कल्पना
एक्सन स्टारको उपमा पाएका अभिनेता निखिल उप्रेती घरजम गरिसकेका अभिनेता हुन् । तर पछिल्लो पटक बाहिरिएको एक भिडियोमा उनलाई अभिनेत्री सारा सिर्पालीसँग प्रेम गन्थन गरेको अवस्थामा देख्न सकिन्छ । जुन कुरा पछिल्लो पटक सार्वजनिक फिल्म ‘पिंजडा व्याक अगेन’को गीतमा प्रस्तुत छ ।
अर्जुन पोखरेल र अञ्जु पन्तको स्वर समावेश ‘तिमी पनि आधा’ बोलको गीत आईतबार सार्वजनिक गरिएको हो । राजधानीमा आयोजित एक कार्यक्रममा नृत्यमा खासै पोख्त नरहेका निखिलले यो पटकको गीतमा केहि फरक अनुभव बटुलेको बताए ।
सार्वजनिक गीतमा कोरियोग्राफी रामजी लामिछानेले गरेका छन् । संगीत अर्जुन पोखरेलको नै छ । ओम साई मौलाकालिका सिने आर्ट्स तथा ओम साई भक्त मुभिजको ब्यानरमा बनेको फिल्मलाई हिमाल केसीले निर्देशन गरेका छन् । हिमाल यसैपनि एक्सन निर्देशनमा कहलिएको नाम हो ।
श्रीराम बराल प्रस्तुतकर्ता रहेको फिल्ममा निखिल र सारासँगै सुस्मिता केसी, पुकार भट्टराई, ज्याक श्रेष्ठ, कुशाग्र भट्टराई लगायतको अभिनय छ । सौरभ लामाले क्यामेरा चलाएका छन् । वनिष शाह र मिलन श्रेष्ठ सम्पादक हुन् ।
मौनता श्रेष्ठको कथामा तयार भएको ‘पिंजडा ब्याक अगेन’ आउँदो माघ ४ मा रिलिज हुँदैछ । फिल्ममा रोहित पुरी, गोविन्द गैरे चन्द्रबहादुर क्षेत्री निर्मातामा छन् भने कार्यकारी निर्मातामा वसन्त शर्मा र सुशान्त श्रेष्ठ रहँदा सहायक निर्मातामा रमेश सुवेदी र बाबुराजा सिंहले साझेदारी गरेका छन् ।
