सुस्ताएका हमालः सकिएकै हो पर्दामा फर्किने दिन ?
राजेश हमाल, नेपाली फिल्म भनेर सुन्ने या जान्ने जो कोहिलाई पनि परिचित नाम हो । एक समय थियो नेपाली फिल्म भनेकै राजेश हमाल भनेर बुझ्ने । पछिल्लो समयमा विकसित सोसियल मिडिया र मास मिडियाको ठुलो पहुँच नपुग्ने ठाउँमा स्पिकर लगाएर कलाकारहरुको नाम लिँदा सुरुमा आउने ‘राजेश हमाल’ शब्दकै कारण दर्शक हल छिर्थे प्रायः फिल्मले हिटको दर्जा पाउँथे ।
तर अब नयाँ पुस्ताले राजेश हमालहरुलाई रिप्लेस गर्दैछ । नयाँ हमालहरु जन्मिईसकेका छन् उदाईसकेका छन् भने महानायकको उपमा समेत पाईसकेका हमाल गुमनाम जस्तै छन् सुस्ताएका छन् । यतिबेला हमालको अभिनय अनि फिल्मी कुराहरुले भन्दा बढि स्थान मिडियामा उनको पारिवारिक पाटोले पाउँछ । अक्कल झुक्कल सार्वजनिक कार्यक्रममा पुग्दा पनि उमेरले ५ दशक पार गरेपछि बिहे गरेका उनलाई अब बच्चा कहिले जन्माउने प्रश्न मिडियाकर्मी गर्छन्, शुभचिन्तकहरुले तेर्स्याउँछन् ।
पछिल्लो पटक ‘बागमती’ फिल्मबाट पर्दामा आएका हमाल त्यसयता ‘शकुन्तला’ नामको फिल्मबाट तेश्रो लिङ्गीको अबतारमा पर्दामा आए दुबै फिल्मले हावा खाए । त्यसपछि दर्शकले चाहेर नचाहेर हमाललाई पर्दामा देख्न नपाएको अनि उनि आउँदै गरेको खबर सम्म पढ्न सुन्न नपाएको १ बर्ष बढि बितिसकेको छ । यो बीचमा उनले फिल्म खेल्दै गरेका, अनुबन्धन भएका भन्ने कुनै समाचार बाहिर आएका छैनन् । या भनौं निर्माता निर्देशकहरु हमालको ढोकामा स्कृप्ट बोकेर जाने दिन सकिए जस्तै छ ।
हमाल पुस्ताका उनका दोस्तियारीहरु कोहि ‘बुबा’को भुमिकामा पर्दामा आईरहेका छन् कोहि फिल्म निर्माण अनि निर्देशनमा लागेका छन् । भुवन केसी, सरोज खनालदेखि रमेश उप्रेती, निखिल उप्रेतीहरु यसका उदाहरण हुन् तर हमालले हिरो बाहेकका अबतारमा फिल्म उद्योगमा अहिलेसम्म परिचय थप्न सकेका छैनन् । उनकै सहपाठी अभिनेता ‘ठुल्दाई’ उर्फ शिव श्रेष्ठ समेत फिल्म निर्माणमा जुटिसकेका छन् ।
समय समयमा उनले फिल्म निर्देशन गर्ने चर्चा चल्छ, यो प्रकारको चर्चा चल्न लागेको करिब ३ बर्ष नै पुगिसकेको छ । आफै पनि मिडियामाझ प्रस्तुत हुँदा फिल्म बनाउँछु बोल्छन् तर उनले कहिले बनाउँछन्, निर्देशन गर्छन् या निर्माण गर्छन् यो कुरा मिडिया, दर्शक तथा उनका शुभचिन्तकहरुमा चासोको विषय मात्रै बनेको छ । उनले बनाउने फिल्म र भोलीका दिनमा रोज्ने बाटो सबै गौण छ ।
त्यसो त पछिल्ला दिनमा हमाल फिल्मी क्षेत्रको गतिविधीमा भन्दा बढि विदेशका कार्यक्रम अनि देशका हुने स्टेज कार्यक्रमदेखि महोत्सवमा व्यस्त हुन्छन् उतै देखिन्छन् भेटिन्छन् । जसकै कारण पनि उनलाई पछिल्लो समय सुस्ताएको आरोप लाग्दै आईरहेको छ अनि प्रश्न उठ्छ हमाल पर्दामा फर्किने दिन सकिएकै हो त ?
(तश्विरहरु सामाजिक सञ्जाल)
