अनमोलको ‘कृ’ फाइनल रिलिज तय, दयाहाङसँग भिडन्त पक्का
लामो रस्साकस्सीका बीच अन्ततः निर्माण टिमले युवा स्टार अनमोल केसीको फिल्म ‘कृ’को आधिकारिक रिलिज तय गरेको छ । यसअघि बारबार रिलिज मिति तय भएर सुटिङ नै हुन नसकेको फिल्मको अन्तिम रिलिज मिति लक भएको हो ।
‘कृ’ अब आउँदो माघ २६ बाट दर्शकमाझ आउने निर्माता सुबास गिरीले लेखेका छन् । निर्माता गिरीले सामाजिक सञ्जाल फेसबुकमा स्टाटस लेख्दै मंसिरको पहिलो हप्ता ट्रेलर रिलिज गर्ने समेत उनले उल्लेख गरेका छन् । गिरीका अनुसार फिल्मको अन्तिम सेड्युअलको छायाँकन बिट मारिँदैछ ।
यसअघि भदौ, कार्तिक तथा दशैंमा यो फिल्म रिलिजको चर्चा थियो । तर अब भने ‘कृ’ पर्खिने दर्शकले मंसिरमा यो फिल्मको ट्रेलर देख्न पाउने भएका छन् । निर्माता गिरीसँग अभिनेता तथा अनमोल पीता भुवन केसीले यो फिल्मको लगानीमा साझेदारी गरेका छन् । अनमोलले पारिश्रमिक मात्रै २० लाख लिएको चर्चाले नै फिल्मले ठुलो हाईप पाएको थियो ।
सुरेन्द्र पौडेल निर्देशित फिल्ममा अनमोल केसी, अदिती बुढाथोकी, अनुपबिक्रम शाहि लिड रोलमा छन् । यसैबीच माघ २६ मा आउँदै गर्दा ‘कृ’को भिडन्त अब ‘कान्छी’ फिल्मसँग हुने पक्का भएको छ । श्वेता खड्का र दयाहाङ राई स्टारर ‘कान्छी’ले केहि दिन पहिले उक्त मितिमा रिलिज लक गरेको थियो ।
