ब्रेकअपपछि निशाको प्रेम वियोगमा हसन (भिडियो)

यहि कार्तिक २४ बाट प्रदर्शनको तयारीमा रहेको फिल्म ‘रोमियो’को ‘स्याड भर्सन’को गीत रिलिज भएको छ । रिलिज मिति आउन केहि दिन मात्र बाँकी रहँदा निर्माण टिमले फिल्ममा समावेश अन्तिम गीत रिलिज गरेको हो । सार्वजनिक गीतमा अभिनेता हसनराजा खान र अभिनेत्री निशा अधिकारी फिचर छन् ।

सम्बन्ध विच्छैदपछि प्रेम पीडामा तड्पिएका हसनले पोखेको निशाप्रतिको सम्झनाको आशय गीतले बोल्छ । गीतमा कुर्वान अली खान र अमृता लिम्बुको स्वर छ । संगीत भर्दै शब्द पनि कुर्वानले नै लेखेका छन् । रामेश्वर कार्की छायाँकार छन् ।

एचआरके प्रोडक्सनको तर्फबाट तयार फिल्म ‘रोमियो’लाई शंकर कार्कीले निर्देशन गरेका हुन् । फिल्ममा हसन र निशासँगै ओशिमा बनु, मेलिना मान्धर लिड अभिनयमा छन् । किरण माइकलको कथामा तयार फिल्मलाई साहिल खानले सम्पादन गरेका छन् भने द्वन्द्व अष्ट महर्जनको छ ।