फागुनमा सौगात र सृजनाको ‘पञ्जेबाजा’ कन्फर्म
फागुन ११ गतेलाई अफिसियल रिलिज तय गर्दै फिल्म ‘पञ्चेबाजा’को फर्ष्टलुक पोस्टर सार्वजनिक गरिएको छ । तीन गाउँले पात्रको कथा प्रस्तुत गरिएको फिल्मको फर्स्टलुक पोस्टरमा अभिनेता सौगात मल्लसँगै कर्मा शाक्य, सृजना सुब्बा, बुद्धि तामाङसँगै जस्मिन श्रेष्ठ मुख्यतः फिचरिङमा छन् ।
फिल्मका निर्देशन घनश्याम लामिछानेले हुन् । फिल्मको फष्टलुकमा प्रमुख कलाकारहरुलाई स्थान दिइएको छ । न्यू भेनस फिल्मस् को व्यानरमा निर्माण भएको फिल्ममा राजेश शाहीको लगानी छ । फिल्ममा सौगात मल्ल, कर्मा, बुद्धि तामाङ, सिर्जना सुब्बा, जस्मिन श्रेष्ठ, प्रकाश घिमिरे, सबिन बास्तोला, प्रमिला तुलाचन, देशभक्त खनाल, युवराज भण्डारी, तेज गिरी र राजेश शाहीको अभिनय छ ।
निर्देशक लामिछानेले गाउँका उल्लेखित तीन युवाको वरीपरी फिल्म घुम्ने बताए । ‘फिल्मको नाम अनुसार फिल्म पनि मौलिक बनाएका छौं । त्यसकारण यो दर्शकको रोजाईमा अवश्य पर्नेछ ।’ उनले भने । घनश्यामले यसअघि ‘धौली’ र ‘अग्नीदहन’ निर्देशन गरिसकेका छन् ।
निर्माता शाहीले यसअघि नै ‘कवच’, ‘मेरो मनको साथी’, ‘बीच बाटो’ निर्माण गरिसकेका छन् । निर्माता शाहीले आफूले राम्रो फिल्म बनाउन कुनै पनि कसुर बाँकी नराखेको बताए ।
सारा गुरुङ सहनिर्माता रहेको फिल्ममा कालीप्रसाद बास्कोटा र विकास चौधरीको संगीत छ भने दीर्घ खड्काको सम्पादन, प्रदिप भारद्वाजको लेखन समावेश छ ।
