सकियो ऋचा र अर्पणको चक्कर !
नेशनल मिडिया प्रोडक्शनको व्यानरमा बनेको फिल्म ‘चक्कर’को ईण्डक्ल्याप भएको छ । फिल्ममा समावेश ‘विहानीको किरणसँगै रातको मात पनि’ बोलको पार्टी गीत खिचेसँगै पश्चात फिल्मको सम्पुर्ण छायाँकन सकिएको हो ।
अन्य दृश्यहरु भने यसअघि नै खिचिसकिएको छ । फिल्मको सम्पादनको काम यतिबेला अन्तिम चरणमा पुगिसकेको निर्देशक अनुष्क रौनियारले बताए । यसअघि ‘ककटेल’ नामको फिल्म निर्देशन गरेका रौनियार पछिल्लो समय नेपाली फिल्म उद्योगमा भित्रिएका निर्देशकहरुको सुचीमा सम्भावनावान निर्देशकमा गनिन्छन् । उनले भारतको पुणे सिम्वाईसीसबाट फिल्म मेकिङमा ग्रायजुएट गरिसकेका छन् ।
यो फिल्ममा एवनराज उप्रेती, अर्पण थापा, ऋचा शर्मा, भोलाराज सापकोटा, सृजना सुब्बा, स्मृति पोखरेल र सुन्दर श्रेष्ठ लगायत लिड अभिनयमा छन् । फिल्मलाई रविन आचार्यले छायाँकन गरेका हुन्। पछिल्लो फिल्म ‘डाईङ क्याण्डल’बाट अवार्ड थाप्नमा व्यस्त आचार्यले ओस्कार कलेजबाट सिनेमाटोग्राफीमा ग्रायजुएट गरिसकेका छन् ।
आउँदो बर्ष २०७५ को बैशाखमा रिलिज तार्गेट गरिएको फिल्मको केहि दिनमा नै फर्स्टलुक सार्वजनिक गर्ने तयारी भईरहेको निर्माता समेत रहेका सिनेमाटोग्राफर आचार्यले बताए । फिल्ममा पाँच गीत समावेश छन् जहाँ संगीत संगम पन्त र नितेशजंग कुवंरको छ ।
फिल्ममा उल्लेखित ६ जना पात्र नै मुख्य भुमिकामा रहँदा उनिहरु सबैको वैवाहिक सम्बन्धपछिको प्रेम कहानी फिल्मले बोल्छ ।
